سرِ محشر بھی مانندِ حروفِ التجا آؤں- برستی آنکهو خیال رکهنا (2018)

مدینے میں کہیں بھی چشمِ تر اپنی چھپا آؤں
مواجھے میں چراغِ آرزو لاکھوں جلا آؤں

اجازت آپؐ سے لے کر میں راتوں رات چپکے سے
جوارِ گنبدِ خضرا میں اپنا گھر بنا آؤں

میں رکھ آؤں مدینے کے در و دیوار پر آنکھیں
میں ہر دھڑکن اُنہیؐ کی رہگذاروں میں چھپا آؤں

وہی حرفِ دعا دیں گے، وہی آبِ شفا دیں گے
سلگتے زخم سلطانِ مدینہ کو دکھا آؤں

غبارِ شہرِ دلکش سے بنے میرا کفن یارب!
چراغِ زندگی شامِ مدینہ میں بجھا آؤں

قلم کو خوشبوؤں کے ہاتھ پر رکھ کر محبت سے
گلِ تازہ سرِ گلزارِ مدحت میں کِھلا آؤں

کروڑوں آئنے ریگِ رواں میں جگمگاتے ہیں
تمناؤں کے رنگیں پھول گلیوں میں سجا آؤں

ازل سے تا ابد اُنؐ پر درودوں کی گرے شبنم
ذرا رکنا اجل! بادِ صبا کو یہ بتا آؤں

میں تصویرِ ادب بن کر رہوں پہروں مواجھے میں
سرِ محشر بھی مانندِ حروفِ التجا آؤں

کتابِ آرزو میں نام لکھ کر اپنے آبا کے
ریاضؔ اپنے قبیلے کے مقدّر کو جگا آؤں