ادب کی اوڑھنی لے کر ہوائے فکر و فن ٹھہرے- برستی آنکهو خیال رکهنا (2018)

شریکِ داستاں شادابیٔ صحنِ چمن ٹھہرے
مدینے کا خنک موسم قلم کا پیرہن ٹھہرے

سلامی کے لئے بیتاب ہیں لاکھوں مہ و انجم
مدینے کی فضاؤں پر ابھی نیلا گگن ٹھہرے

یہی اک التجا ہے اے خدائے مصطفیٰؐ تجھ سے
غبارِ خلدِ طیبہ ہم غریبوں کا کفن ٹھہرے

طبیبِ اوّل و آخر کے قدموں میں قیامت تک
حروفِ التجا بن کر مرا زخمی بدن ٹھہرے

مَیں سامانِ سفر میں باندھ لوں سب دھڑکنیں دل کی
ابھی میری تڑپ ٹھہرے، ابھی میری لگن ٹھہرے

منڈیروں پر چراغِ مدحتِ سرکارؐ جلتے ہیں
تعجب کیا؟ اگر شب کا ہدف شہرِ سخن ٹھہرے

اجازت روشنی کو ہے مدینے میں اترنے کی
چراغوں کا دھواں شب بھر پسِ کوہ و دمن ٹھہرے

وہ شہرِ علم ہیں اُنؐ کے دیارِ نور و نکہت میں
ادب کی اوڑھنی لے کر ہوائے فکر و فن ٹھہرے

ریاضؔ اُنؐ کا قصیدہ لکھ رہا ہوں چشمِ پُرنم سے
ہجومِ گُل بھی رک جائے، ذرا سر و سمن ٹھہرے