بہت کچھ سوچ کر شہرپیمبرؐ میں قدم رکھنا- برستی آنکهو خیال رکهنا (2018)

لحد کے گوشۂ انوارِ مدحت میں قلم رکھنا
ہواؤ! میرے ہاتھوں پر بھی اوراقِ حرم رکھنا

بہت نازک درودِ مصطفیٰؐ کے آبگینے ہیں
بہت کچھ سوچ کر شہرِ پیمبرؐ میں قدم رکھنا

مری نسلوں کو دینا تو حروفِ نعت کی ٹھنڈک
مرے چھوٹے سے گھر سے دور، مولا! رنج و غم رکھنا

ہوا کے دامن صد چاک میں روزِ قیامت تک
مرے ہر کھیت کے حصے کی بارانِ کرم رکھنا

منظم سازشوں نے سر اٹھایا ہے مسلمانو!
سرِ فہرست ظلماتِ فقیہانِ عجم رکھنا

تمہاری عظمتِ رفتہ یقینا لوٹ آئے گی
سرِ مقتل ہمیشہ جاں نثاری کا علم رکھنا

وہی توقیرِ آدم کی بحالی کا سبب ٹھہرے
بلندی پر متاعِ عشق کا جاہ و چشم رکھنا

وصیت ہے بزرگوں کے بزرگوں کی مرے بچو!
سدا پیشِ نظر حرفِ لبِ میرِ اممؐ رکھنا

مواجھے میں کھڑے رہنا تو تصویر ادب بن کر
ریاضؔ آبا کے اندازِ غلامی کا بھرم رکھنا

*

شاعر تری عطاؤں کا رکھے گا کیا حساب
یارب! ترے کرم کی کوئی انتہا نہیں