بیاضِ نعت کی دعا- روشنی یا نبی ﷺ (2018)

میز پر رکھی بیاضِ نعت نے دی ہے دعا
جا، قلم تیرا ہمیشہ روشنی لکھتا رہے

چوم کر نقشِ کفِ پائے رسولِ محتشم ﷺ
تیری قسمت میں مدینے کی گلی لکھتا رہے

قبر کے ہر گوشۂ مدحت میں روزِ حشر تک
تیرے ہونٹوں پر درودِ آخری لکھتا رہے

اذن لے کر مصحفِ قرآن سے اے خوشنوا
عشق میں ڈوبی ہوئی بس شاعری لکھتا رہے

گنبدِ سرکار ﷺ سے بھر بھر کے اپنی جھولیاں
دلکشی ہی دلکشی ہی دلکشی لکھتا رہے

امنِ عالم کی کتابِ لب کُشا میں رات دن
فاختاؤں کے پروں پر شانتی لکھتا رہے

جا، ریاضِؔ لب کُشا تو خیمۂ سرکار ﷺ میں
روزِ محشر لب بہ لب نعتِ نبی ﷺ لکھتا رہے