یا مصطفیٰ ﷺ، یا سیّدِ سادات السّلام- روشنی یا نبی ﷺ (2018)

یا مصطفیٰ ﷺ ، یا سیّدِ سادات، السّلام
سب کی دعا کے صاحبِ میقات ﷺ ، السّلام

سر تا قدم جمالِ محبت! مرا درود
افضل رسول ﷺ ، نور کی برسات، السّلام

صبحِ ازل کے سرمدی انوار، مرحبا
حسن و جمالِ شہرِ مناجات، السّلام

سرتاجِ انبیاء و رسل پر سلام ہو
اے پرتوِ خدائے سماوات، السّلام

مجھ کو حضور ﷺ آپ ﷺ نے پھر ہے طلب کیا
میری طرف ہو چشمِ عنایات، السّلام

کشکولِ آرزو میں ندامت کے اشک ہیں
میرے ہیں ہاتھ میرے مفادات، السّلام

جاؤں کدھر، حضور ﷺ ، کوئی راستہ نہیں
لپٹی ہوئی بدن سے ہیں حاجات، السّلام

مَیں کربلائے عَصْر میں تنہا ہوں، یا نبی ﷺ
وجہِ قرار، دافعِ آفات، السّلام

آمد سپاہِ شب کی وطن میں ہے اِن دنوں
غم ہے تو ایک غم ہے یہ دن رات، السّلام

جھوٹی تسلیاں بھی اب دیتا نہیں کوئی
ارض و سما میں حسنِ مساوات، السّلام

میرے وطن کی سبز ہواؤں کا لیں سلام
کہتے تھے میرے دیس کے ذرّات، السّلام

آقا حضور ﷺ ، خلدِ مدینہ میں ہر طرف
عنبر فشاں ہیں میرے خیالات، السّلام

دستِ دعا اٹھائے ہیں دربار میں، حضور ﷺ
اللہ بدل دے میرے بھی حالات، السّلام

اشکوں سے تر فضا تھی مرے گھر کی، یانبی ﷺ
ہر لب پہ ایک لفظ تھا دن رات، السّلام

کس کس طرح حضور ﷺ نوازا ہے آپ ﷺ نے
شہرِ ادب میں کیا مری اوقات، السّلام

آقا ﷺ ، ریاضؔ کا ہے اثاثہ فقط یہی
اشکِ رواں کی لایا ہے سوغات، السّلام