منصب ثنا کا حشر کے دن بھی ملا رہے- روشنی یا نبی ﷺ (2018)

موسم حروفِ سبز کا کھولے گا در تمام
خوش بخت ساعتوں کا مرے گھر میں ہے قیام

کشتِ ثنا میں بادِ بہاری چلے گی آج
قندیلِ عشق شہرِ ادب میں چلے گی آج

اشکوں میں عکسِ گنبدِ خضرا بتاؤں گا
ہونٹوں پہ حرفِ نعتِ پیمبر ﷺ سجاؤں گا

آنکھیں سپردِ لوح و قلم آج بھی کروں
ہر ہر ورق پہ پھول رقم آج بھی کروں

تازہ خنک ہوا مرے آنگن میں آئے گی
آنچل میں خاک شہرِ منوّر کی لائے گی

برسیں گے آج رنگ دھنک کے قدم قدم
مہکے گی آج بوئے گلستانِ محتشم

خوشبو چراغ رکھے گی ہر اک منڈیر پر
لوحِ سخن پہ نعت کے لکھے گی حرفِ زر

ہر ہر قدم پہ آئنے رکھوں گا آج بھی
ہر آرزو کے سر پہ سجاؤں گا تاج بھی

حرفِ درود لب پہ کھلا ہے کھلا رہے
منصب ثنا کا حشر کے دن بھی ملا رہے

میں آج بھی ہوں شہرِ نبی ﷺ کے غبار میں
خلدِ زمیں کے دامنِ لیل و نہار میں