کہاں اک بے نوا شاعر، کہاں آیاتِ قرآنی- روشنی یا نبی ﷺ (2018)

کہاں اک بے نوا شاعر، کہاں آیاتِ قرآنی
کہاں طرزِ فغاں میری، کہاں اسلوبِ یزدانی

کہاں اک بے نوا شاعر، کہاں یہ کلکِ نمدیدہ
کہاں عاجز زباں میری، کہاں اُن ﷺ کی ثنا خوانی

کہاں اک بے نوا شاعر، کہاں مدحت پیمبر ﷺ کی
کہاں لکنت قلم میں بھی، کہاں اسنادِ رحمانی

کہاں اک بے نوا شاعر، کہاں کج مج سی تحریریں
کہاں دامن تہی میرا، کہاں مرسل وہ لاثانی

کہاں اک بے نوا شاعر، کہاں سدرہ نشیں آقا ﷺ
کہاں معراج کی رتیا، کہاں تضحیکِ انسانی

کہاں اک بے نوا شاعر، کہاں دستِ کرم اُن ﷺ کا
کہاں وہ پیکرِ شفقت، کہاں امت کی نادانی

کہاں اک بے نوا شاعر، کہاں نوحے، کہاں آنسو
کہاں اجڑی ہوئی بستی، کہاں گلشن کی ویرانی

کہاں اک بے نوا شاعر، کہاں دربار آقا ﷺ کا
کہاں رحمت کی وہ کثرت، کہاں یہ تنگ دامانی

کہاں اک بے نوا شاعر، کہاں نقشِ قدم اُن ﷺ کے
کہاں زر کا پجاری مَیں، کہاں میری مسلمانی

کہاں اک بے نوا شاعر، کہاں اصحابؓ کی محفل
کہاں تلچھٹ مَیں صدیوں کی، کہاں محبوبِ ﷺ سبحانی

کہاں اک بے نوا شاعر، کہاں انوار طیبہ کے
کہاں بارش عطاؤں کی، کہاں صدیوں کی حیرانی

کہاں اک بے نوا شاعر، کہاں اُن ﷺ کا درِ دولت
کہاں یہ مفلسی میری، کہاں تختِ سلیمانی

کہاں اک بے نوا شاعر، کہاں جھلمل ستاروں کی
کہاں شب کی یہ تاریکی، کہاں جلووں کی تابانی

کہاں اک بے نوا شاعر، کہاں لمحے حضوری کے
کہاں دعویٰ غلامی کا، کہاں غیروں کی دربانی

کہاں اک بے نوا شاعر، کہاں اتنی پذیرائی
کہاں خوشیوں کا وہ لشکر، کہاں غم کی فراوانی

کہاں اک بے نوا شاعر، کہاں کلکِ ادب میری
کہاں غارِ حرا والے، کہاں میری پشیمانی

کہاں اک بے نوا شاعر، کہاں توصیف گر ہونا
کہاں ساگر کی وہ موجیں، کہاں خطّہ یہ بارانی

کہاں اک بے نوا شاعر، کہاں وہ مرسلِ آخر ﷺ
کہاں میں اک نکمّا سا، کہاں یہ فضلِ ربّانی

کہاں اک بے نوا شاعر، کہاں وہ گنبدِ خضرا
کہاں میری غزل گوئی، کہاں میری سخن دانی

کہاں اک بے نوا شاعر، کہاں الجھی ہوئی سَمتیں
کہاں اب رہ گیا اولاد میں بھی زعمِ سلطانی

کہاں اک بے نوا شاعر، کہاں لوحِ ثنا میری
کہاں میری جگر سوزی، کہاں میری قلمدانی

کہاں اک بے نوا شاعر، کہاں وہ ہادیٔ برحق
کہاں میری شبِ غفلت، کہاں اُن ﷺ کی نگہبانی

کہاں اک بے نوا شاعر، کہاں وہ ساقیٔ کوثر ﷺ
ملی ہے قصرِ مدحتِ میں مجھے ادنیٰ سی دربانی

کہاں اک بے نوا شاعر، کہاں کونین کے والی
مسلسل شہرِ مدحت میں رہے مدحت کی ارزانی

کہاں اک بے نوا شاعر، کہاں وہ فکرِ تابندہ
نہیں ہے میر و سلطاں کے دلوں میں نورِ ایمانی

کہاں اک بے نوا شاعر، کہاں خِلعت غلامی کی
چمن زارِ دعا کا آج بھی چہرہ ہے نورانی

کہاں اک بے نوا شاعر، کہاں یہ جاں بلب ساعت
مری چشمِ طلب پر ہو مسلسل شبنم افشانی

کہاں اک بے نوا شاعر، کہاں جاروب کش اُن ﷺ کا
ملے اُن ﷺ کی غلامی کا مجھے اعزازِ لافانی

کہاں اک بے نوا شاعر، کہاں الطاف کی رم جھم
نہیں بھولی مواجھے میں غلاموں کی وہ مہمانی

کہاں اک بے نوا شاعر، کہاں اِس کو طلب کرنا
نہیں تھمتی درِ سرکار ﷺ پر اشکوں کی طغیانی

کہاں اک بے نوا شاعر، کہاں تک دسترس اس کی
بہت کچھ کہہ رہی ہے، یانبی ﷺ، زخموں کی عریانی

کہاں اک بے نوا شاعر، کہاں شب، خون آلودہ
پراگندہ کریں اذہان کو اعمالِ شیطانی

کہاں اک بے نوا شاعر، کہاں میلاد کی برکھا
مرے ایقاں پہ ہے تشکیک کی یلغارِ طوفانی

کہاں اک بے نوا شاعر، کہاں سیرت پیمبر ﷺ کی
غبارِ کرب میں لپٹی ہوئی ہے نَسلِ انسانی

کہاں اک بے نوا شاعر، کہاں قدروں کی پامالی
ہوس نے سب بدل ڈالے ہیں اندازِ جہانبانی

کہاں اک بے نوا شاعر، کہاں سرکار ﷺ نبیوں کے
چراغِ آرزو لائی ہے پھولوں کی مہارانی

کہاں اک بے نوا شاعر، کہاں مشعل درودوں کی
قلم کے ہاتھ میں ہے آج بھی لعلِ بدخشانی

کہاں اک بے نوا شاعر، کہاں برسات پھولوں کی
ہوا خیمے اٹھا لائی ہے پربت سے زمستانی

کہاں اک بے نوا شاعر، کہاں وہ صاحبِ حکمت
فروغِ مدحتِ آقا ﷺ کی ہے صورت یہ انجانی

کہاں اک بے نوا شاعر، کہاں اہداف دشمن کے
جوارِ دل میں خیمہ زن ابد تک ہے درخشانی

کہاں اک بے نوا شاعر، کہاں یہ تتلیاں، جگنو
ہے خوشبو بھی مدینے کے گلی کوچوں کی دیوانی

کہاں اک بے نوا شاعر، کہاں میرا قلم تنہا
مری تنہائیوں کا راز داں ہے یہ مرا جانی

کہاں اک بے نوا شاعر، کہاں فضلِ خدا اتنا
وہی تو پیدا کر دیتا ہے، ہر مشکل میں آسانی

مَیں فرطِ شوق سے نامِ محمد ﷺ چوم لیتا ہوں
سبق اُن ﷺ کی غلامی کا جہاں والوں کو دیتا ہوں