تاج و تختِ انبیاء ہے آپ ﷺ کا شہرِ کرم- روشنی یا نبی ﷺ (2018)

دل نشین و دلکشا ہے آپ ﷺ کا شہرِ کرم
دلنواز و دلربا ہے آپ ﷺ کا شہرِ کرم

عکس سب ڈوبے ہوئے ہیں آپ ﷺ کے انوار میں
آئنہ در آئنہ ہے آپ ﷺ کا شہرِ کرم

سوچتا ہوں مَیں مدینے کی کھجوریں دیکھ کر
میٹھی میٹھی سی فضا ہے آپ ﷺ کا شہرِ کرم

عدل کے روشن چراغوں سے اٹھا اس کا خمیر
خاکِ نوری سے بنا ہے آپ ﷺ کا شہرِ کرم

کربلائے عَصْر ہو یا طائفِ عہدِ جدید
یا نبی ﷺ، فضلِ خدا ہے آپ ﷺ کا شہرِ کرم

آپ ﷺ کی تخلیق، تخلیقِ دو عالم کا جواز
مرکزِ ارض و سما ہے آپ ﷺ کا شہرِ کرم

شہرِ مکہ آپ ﷺ کا، شہرِ مدینہ آپ ﷺ کا
میرے مولا کی رضا ہے آپ ﷺ کا شہرِ کرم

ہر کسی کی آبرو، اسمِ گرامی آپ ﷺ کا
ہر کسی کا منتہا ہے آپ ﷺ کا شہرِ کرم

منزلِ خورشید ہے دہلیز، آقا ﷺ، آپ ﷺ کی
حسرتِ کلکِ ثنا ہے آپ ﷺ کا شہرِ کرم

قریۂ فقر و غنا ہر آپ ﷺ سے منسوب ہے
خطۂ صدق و صفا ہے آپ ﷺ کا شہرِ کرم

یاسیت نے گھیر رکھا ہے مجھے، میرے رسول ﷺ
بے نواؤں کی نوا ہے آپ ﷺ کا شہرِ کرم

آپ ﷺ کے شہرِ خنک کے لوگ ہیں روشن ضمیر
کاملاً نور و ضیا ہے آپ ﷺ کا شہرِ کرم

سایۂ ابرِ کرم ہے آپ ﷺ کا نقشِ قدم
سارے عالم کی عبا ہے آپ ﷺ کا شہرِ کرم

اِس کے صدقے میں دعاؤں کو پذیرائی ملی
خود بھی اک حرفِ دعا ہے آپ ﷺ کا شہرِ کرم

آپ ﷺ کے شہرِ ادب کی شام ہے کتنی حسیں
خوبرو ہے، خوشنما ہے، آپ ﷺ کا شہرِ کرم

جادۂ صبر و رضا پر یامحمدمصطفیٰ ﷺ
حوصلہ ہی حوصلہ ہے آپ ﷺ کا شہرِ کرم

اجنبیت کا کہاں احساس ہوتا ہے یہاں
دل کی دنیا میں بسا ہے آپ ﷺ کا شہرِ کرم

ہر لغت کی آبرو ہے آپ ﷺ کا ذکرِ جمیل
ہر ورق کا حاشیہ ہے آپ ﷺ کا شہرِ کرم

ہر بلندی آپ ﷺ کی چوکھٹ پہ ہوتی ہے نثار
ارتقا کا ارتقا ہے آپ ﷺ کا شہرِ کرم

آپ ﷺ کے شہرِ خنک کا تذکرہ میں کیا کروں
قَصْرِ مدحت کی بِنا ہے آپ ﷺ کا شہرِ کرم

کتنی صدیاں منتظر تھیں آپ ﷺ کے میلاد کی
سجدہ گاہِ اولیاء ہے آپ ﷺ کا شہرِ کرم

اس کے ہر ذرّے کے سر پر ہے پر و بالِ ہما
تاج و تختِ انبیاء ہے آپ ﷺ کا شہرِ کرم

مل رہا ہے ہر تمدّن کو مدینے سے فروغ
روز و شب کا ضابطہ ہے آپ ﷺ کا شہرِ کرم

مَیں جوارِ گنبدِ خضرا میں گھر ڈھونڈوں، حضور ﷺ
قلبِ حیراں کی صدا ہے آپ ﷺ کا شہرِ کرم

سارے عالم کا بھرم رکھا ہوا ہے آج بھی
آخری بندِ قبا ہے آپ ﷺ کا شہرِ کرم

ہر اجالے کی ہیں پیشانی پہ طیبہ کے نقوش
روشنی کی ابتداء ہے آپ ﷺ کا شہرِ کرم

عمر بھر زندہ مسائل کی سلگتی کوکھ میں
حوصلہ دیتا رہا ہے آپ ﷺ کا شہرِ کرم

آپ ﷺ کے شہرِ ادب کی دے گا کیا کوئی مثال
جھومتی کالی گھٹا ہے آپ ﷺ کا شہرِ کرم

ان فضاؤں میں ازل سے فضلِ ربی ہے شریک
بخششوں کی انتہا ہے آپ ﷺ کا شہرِ کرم

بام و در شہرِ خنک کے مجھ سے کرتے ہیں کلام
لمحہ لمحہ دلربا ہے آپ ﷺ کا شہرِ کرم

علم و حکمت، دانش و برہان اس کے ہمسفر
ہر برائی سے بچا ہے آپ ﷺ کا شہرِ کرم

آج بھی محفوظ ہیں انساں کے بنیادی حقوق
معتبر جس کی ادا ہے آپ ﷺ کا شہرِ کرم

ہو مرا ادنیٰ غلاموں کے غلاموں میں شمار
میرے سینے سے لگا ہے آپ ﷺ کا شہرِ کرم

نَسْلِ آدم اس جزیرے سے چنے آ کر گلاب
خطۂ شرم و حیا ہے آپ ﷺ کا شہرِ کرم

سیّدی یامرشدی میری طرف دستِ عطا
سر تا پا جود و سخا ہے آپ ﷺ کا شہرِ کرم

مَیں برہنہ سر نہیں بے آب موسم میں، حضور ﷺ
میرے سر کی بھی ردا ہے آپ ﷺ کا شہرِ کرم

ننھے مُنّے کھیلتے بچوں کا وہ پاسِ ادب
کس سلیقے سے سجا ہے آپ ﷺ کا شہرِ کرم

ہم غریبوں کے لیے جائے اماں در آپ ﷺ کا
مفلسوں کا آسرا ہے آپ ﷺ کا شہرِ کرم

اس کی توصیف و ثنا ممکن نہیں مجھ سے، حضور ﷺ
انتخابِ کبریا ہے آپ ﷺ کا شہرِ کرم

نَسْلِ آدم موجِ طوفاں سے ڈرے گی کس لیے
کشتیوں کا ناخدا ہے آپ ﷺ کا شہرِ کرم

آپ ﷺ کی رحمت کا دروازہ کھلا ہے یانبی ﷺ
راستوں کا راستہ ہے آپ ﷺ کا شہرِ کرم

ارضِ پاکستاں میں اتریں آفتابوں کے ہجوم
نور و نکہت سے بنا ہے آپ ﷺ کا شہرِ کرم

در گذر کرنے کی عادت مجھ کو بھی کیجئے عطا
عفو و رحمت کی ہوا ہے آپ ﷺ کا شہرِ کرم

آگ برساتے ہوئے سورج تلے، آقا حضور ﷺ
ایک نخلستاں اگا ہے آپ ﷺ کا شہرِ کرم

ہر قدم پر عافیت کے پھول کھلتے ہیں جہاں
وہ کرم کا سلسلہ ہے آپ ﷺ کا شہرِ کرم

جس وسیلے کی ہمیں تلقین کرتا ہے خدا
وہ مقامِ التجا ہے آپ ﷺ کا شہرِ کرم

امن کا باڑا جہاں تقسیم ہوتا ہے، حضور ﷺ
وہ محبت کی جگہ ہے آپ ﷺ کا شہرِ کرم

یہ ازل سے منتظر تھا آپ ﷺ کے چومے قدم
رتجگوں کا رتجگا ہے آپ ﷺ کا شہرِ کرم

خالق و مخلوق کا تقسیم کرتا ہے شعور
ایک سیدھا راستہ ہے آپ ﷺ کا شہرِ کرم

منفرد ہے اس کی ہر شامِ ثناء صبحِ ادب
سارے شہروں سے جدا ہے آپ ﷺ کا شہرِ کرم

رزق ملتا ہے پھلوں کا شہرِ طیبہ میں، حضور ﷺ
سائبانِ ہر گدا ہے آپ ﷺ کا شہرِ کرم

مفلسی میری بدل جائے امیری میں، حضور ﷺ
معجزہ ہے معجزہ ہے آپ ﷺ کا شہرِ کرم

مکتبِ عشقِ نبی ﷺ میں کفر ہے ہر انحراف
تا ابد روشن دیا ہے آپ ﷺ کا شہرِ کرم

کیا مری اوقات لیکن اے مرے اچھے رسول ﷺ
کس محبت سے ملا ہے آپ ﷺ کا شہرِ کرم

مجھ سے خوشبو نے کہا ہے رقص فرماتے ہوئے
باغِ جنت میں کھِلا ہے آپ ﷺ کا شہرِ کرم

آج یہ مجھ پر مواجھے کی فضاؤں میں کھُلا
مہرباں مجھ پر ہوا ہے آپ ﷺ کا شہرِ کرم

ہر مصلّے پر مرے سجدوں کے ہیں لاکھوں نشاں
آبِ کوثر میں دُھلا ہے آپ ﷺ کا شہرِ کرم

جس عقیدت سے قلمبند اشک ہوتے ہیں مرے
اُس عقیدت کا صلہ ہے آپ ﷺ کا شہرِ کرم

میرا دامانِ طلب خالی کبھی رہتا نہیں
مخزنِ لطف و عطا ہے آپ ﷺ کا شہرِ کرم

میری آنکھیں گنبدِ خضرا کا کرتی ہیں طواف
میری آنکھوں میں سجا ہے آپ ﷺ کا شہرِ کرم

میری دلجوئی کرے شہرِ محبت کی ہوا
یا نبی ﷺ، دل کا بڑا ہے آپ ﷺ کا شہرِ کرم

ہر طرف امن و اماں کی فاختاؤں کا نصاب
ردِ شر، ردِ بلا ہے آپ ﷺ کا شہرِ کرم

ہر طرف ایثار و قربانی کے تابندہ نقوش
ہر قدم چرخِ وفا ہے آپ ﷺ کا شہرِ کرم

ہر طرف خوشبو کے پرچم، ہر طرف بادِ خنک
جانِ گل، جانِ صبا ہے آپ ﷺ کا شہرِ کرم

مَیں ریاضِؔ بے نوا جاؤں کہاں در چھوڑ کر
جب مقدّر سے ملا ہے آپ ﷺ کا شہرِ کرم