نیا نعتیہ گیت- روشنی یا نبی ﷺ (2018)

قدمینِ مبارک میں جگہ دیجئے مجھ کو
قسمت کا سکندر بھی کبھی کیجئے مجھ کو

احوالِ پریشاں کی مدینے میں خبر ہو
ہاتھوں میں درودوں کا، سلاموں کا ثمر ہو
طیبہ کی ہواؤں کی ردا دیجئے مجھ کو

قدمینِ مبارک میں جگہ دیجئے مجھ کو
قسمت کا سکندر بھی کبھی کیجئے مجھ کو

مجرم ہوں، نبی جی ﷺ، مَیں کٹہرے میں کھڑا ہوں
میں روزِ ازل سے درِ اقدس پہ پڑا ہوں
جھولی مری بھر بھر کے غنی کیجئے مجھ کو
قدمینِ مبارک میں جگہ دیجئے مجھ کو
قسمت کا سکندر بھی کبھی کیجئے مجھ کو
کرتے ہیں چراغاں مرے بچّے بھی نبی جی ﷺ
کچھ کہتی ہے اِن بچوں کی آنکھوں کی نمی بھی
دامانِ کرم میں بھی چھپا لیجئے مجھ کو

قدمینِ مبارک میں جگہ دیجئے مجھ کو
قسمت کا سکندر بھی کبھی کیجئے مجھ کو

خوشبو مرے آنگن میں نئے پیڑ لگائے
اِن پیڑوں کا ہر پتہ بھی میلاد منائے
گھر جشنِ ولادت میں عطا کیجئے مجھ کو

قدمینِ مبارک میں جگہ دیجئے مجھ کو
قسمت کا سکندر بھی کبھی کیجئے مجھ کو

لایا ہوں میں اشکوں کے گہر اپنے قلم کے
کشکولِ دعا میں گریں سکّے بھی کرم کے
دھوون سرِ دربارِ حرم دیجئے مجھ کو

قدمینِ مبارک میں جگہ دیجئے مجھ کو
قسمت کا سکندر بھی کبھی کیجئے مجھ کو
مَیں نقشِ کفِ پا کا تمنائی ہوں، آقا ﷺ
مَیں آپ ﷺ کا شیدائی ہوں شیدائی ہوں آقا ﷺ
دامن ہے تہی، آقا ﷺ، دعا دیجئے مجھ کو

قدمینِ مبارک میں جگہ دیجئے مجھ کو
قسمت کا سکندر بھی کبھی کیجئے مجھ کو

دریاؤں میں، آقا جی ﷺ، روانی نہیں باقی
آنکھوں میں سلگتا ہوا پانی نہیں باقی
ہر لمحہ برستی سی گھٹا دیجئے مجھ کو

قدمینِ مبارک میں جگہ دیجئے مجھ کو
قسمت کا سکندر بھی کبھی کیجئے مجھ کو