کلی شاخِ قلم پر اپنے لب کھولے، ثنا لکھوں- نصابِ غلامی (2019)

کلی شاخِ قلم پر اپنے لب کھولے، ثنا لکھوں
دیارِ دیدہ و دل پر گھٹا برسے، ثنا لکھوں

اگر شہرِ سخن کی چاندنی توصیفِ مرسل ﷺ سے
ردائے نکہتِ افکارِ نو مانگے، ثنا لکھوں

تخیّل کی گذرگہ سے گھنے پیڑوں کی چھاؤں تک
کوئی جگنو، کوئی تتلی کبھی گذرے، ثنا لکھوں

تصور شہرِ طیبہ کے گلی کوچوں میں لے جائے
چراغِ آرزو سینے میں جل اٹھے، ثنا لکھوں

مَیں اپنی خوش نصیبی پر ستارے بانٹنے نکلوں
مدینے کی ہوا احوالِ دل پوچھے، ثنا لکھوں

پرندے جانبِ طیبہ جو پر کھولیں سرِ گلشن
صبا نعتِ نبی ﷺ پڑھتے ہوئے چھلکے، ثنا لکھوں

مدینے کی ہواؤں سے کریں جب گفتگو جگنو
مرے آنگن میں چپکے سے کرن اترے، ثنا لکھوں

تمناؤں کے لشکر ساتھ لے کر آج کی شب بھی
درِ سرکار ﷺ پر میری صدا پہنچے، ثنا لکھوں

محمد ﷺ مصطفیٰ لکھ کر مَیں تختی پر رکھوں آنکھیں
کوئی طاقِ دل و جاں میں دیے رکھے، ثنا لکھوں

جوارِ گنبدِ خضرا کا منظر آنسوؤں میں ہو
نبی ﷺ کا شہرِ مکہ میں تُو گھر دیکھے، ثنا لکھوں

گلی میں خوشبوؤں کے قافلے ٹھہریں، مرے مولا!
دعا میرے لبوں پر آج بھی مہکے، ثنا لکھوں

مجھے تشکیک کی تاریکیوں سے خوف آتا ہے
مرے اوہام کا بھی سلسلہ ٹوٹے، ثنا لکھوں

مجھ عاجز کو غلامی کی ملے سرکار ﷺ سے چادر
بدن سے آج عفریتِ اَنا نکلے، ثنا لکھوں

دمِ رخصت مؤدب ہچکیوں کی التجائیں ہوں
شبِ آخر درِ آقا ﷺ پہ دل تڑپے، ثنا لکھوں

مصلّے پر کھڑے ہو کر حضوری کی دعا مانگوں
ادب کی روشنی سجدوں میں بھی بکھرے، ثنا لکھوں

ہر اک لمحہ حصارِ عافیت میں اب گذرتا ہے
کرم کی داستاں اوراق پر ابھرے، ثنا لکھوں

ہوا مشعل اٹھا کر چل پڑے بطحا کی وادی میں
امیرِ قافلہ جب راستہ ڈھونڈے، ثنا لکھوں

درودوں کے لیے گجرے صبا فرطِ مسرت سے
بیاضِ نعت کے اوراقِ نم الٹے، ثنا لکھوں

مری چشمِ تمنا آنسوؤں کے پھول برسائے
ہر اک حرفِ دعا برسات میں بھیگے، ثنا لکھوں

گذر گاہِ مدینہ پر غبارِ ریگِ صحرا میں
قلم فکرِ عجم کا پیرہن بدلے، ثنا لکھوں

مرے ہر لفظ میں اتریں عرب کے چاند کی کرنیں
مری پلکوں پہ اشکوں کی دھنک لرزے، ثنا لکھوں

اگرچہ ظلمتِ شب بھی مسلسل ہے تعاقب میں
مگر لوح و قلم پر کہکشاں چمکے، ثنا لکھوں

صبا اسمِ محمد ﷺ لکھ رہی ہے لوحِ مدحت پر
ادب کے دائرے میں رہ کے دل دھڑکے، ثنا لکھوں

ریاضؔ امشب بھی لمحے وَجْد میں آئیں سرِ محفل
ریاضؔ امشب بھی خوشبو رقص میں آئے، ثنا لکھوں