گم مدحتِ نبی ﷺ میں ہے نطق و بیاں ترا- نصابِ غلامی (2019)

گم مدحتِ نبی ﷺ میں ہے نطق و بیاں ترا
کیسے کوئی مٹائے گا نام و نشاں ترا

عرشِ بریں پہ جانے سے پہلے بصد ادب
ٹھہرے درِ نبی ﷺ پہ ہجومِ فغاں ترا

ہر لفظ احترام کے اوڑھے بدن پہ پھول
ہر لمحہ احتساب کا ہے امتحاں ترا

تو نے چراغِ نعت رکھے ہیں منڈیر پر
ہے موسمِ بہار کی منزل مکاں ترا

راہِ وفا میں سنگِ مفاسد کے باوجود
محوِ سفر ہے عشقِ نبی ﷺ ! کارواں ترا

معراجِ مصطفیٰ ﷺ کی بشارت ہے یہ عظیم
تاروں سے بھر گیا ہے زمیں! آسماں ترا

سرمایۂ حیات ہے توصیفِ مصطفیٰ ﷺ
ممنون ہوں میں آج بھی عمرِ رواں ترا

ہر حرفِ آرزو کے ہے لب پر یہی دعا
آباد حشر تک رہے شہرِ گماں ترا

پوچھیں گے لوگ شاعرِ شاہِ عرب ہے کون
محشر میں بھی چلے گا زرِ جاوداں ترا

مجھ سے ملا کے ہاتھ ہوا لب کشا ہوئی
شام و سحر قلم رہے عنبر فشاں ترا

تشکیک و افتراق کی آندھی میں آج بھی
رستہ نہ بھول جائے کہیں سارباں ترا

منصب ملا دفاعِ نبی ﷺ کا تجھے، ریاضؔ
گونجے گا روزِ حشر بھی حرفِ اذاں ترا