حدیثِ کربلا- شعورِ کربلا (2018)

نہ کسی زماں میں تلاش کر، نہ کسی مکاں میں تلاش کر
زرِ نکہتِ گلِ بندگی، رہ مقتلاں میں تلاش کر

مری ذات پر بھی ہو منکشف کہ حدیثِ کرب و بلا ہے کیا
مرے ہمسفر مجھے آج بھی اسی داستاں میں تلاش کر

مجھے آنسوؤں کا خراج دے، مری چشمِ نم، مری فردِ غم
جو کبھی گرے تھے زمین پر انہیں آسماں میں تلاش کر

کبھی خاکِ ضبطِ فغاں سے مل، کبھی شاخِ کرب و بیاں پہ کھل
جو گدازِ حرفِ شعور ہے اُسے شہرِ جاں میں تلاش کر

تجھے روشنی کی تلاش تھی، تجھے روشنی کی تلاش ہے
تو جمالِ صبحِ جمیل کو شبِ خونچکاں میں تلاش کر

میں ریاضِؔ عشقِ نبی ﷺ بھی ہوں، مَیں غلامِ ابنِ علی بھی ہوں مرے جسم و جاں کے غبار کو اسی سائباں میں تلاش کر