ابنِ بتول شاہِ شہیداں سلام ہو- شعورِ کربلا (2018)

اے حریت کے باب کے عنواں سلام ہو
اے ملکِ عزم و صبر کے سلطاں سلام ہو

اے روحِ انقلابِ دل و جاں سلام ہو
اے پاسبانِ عظمتِ انساں سلام ہو

اے ذی وقار، کلکِ مصّوِر کے شاہکار
اے حق شناس، حاملِ قرآں سلام ہو

تو زندگی کی زندہ حقیقت ہے یا حسینؓ
دینِ نبی ﷺ کی شمعِ فروزاں سلام ہو

تو اہلِ دل کے ٹوٹے سفینے کے ناخدا
ابنِ بتول، شاہِ شہیداں سلام ہو

روشن ترے لہو سے ہے قندیلِ آگہی
اہلِ شعور و ہوش کے ایماں سلام ہو

دوشِ نبی ﷺ پہ جھولنے والے صد آفریں
جانِ رسول، روحِ گلستاں سلام ہو

پیہم نظر میں تیری رہا مقصدِ حیات
اے رازدانِ فطرتِ یزداں سلام ہو

تیور وہی ہیں آج بھی بزمِ یزید کے
اے آبروئے صبحِ درخشاں سلام ہو

اے دشتِ نینوا کے مسافر مرا سلام
اے کربلا کی خاکِ پریشاں سلام ہو