قندیل آرزو کی جلائیں گی تتلیاں- ورد مسلسل (2018)

قندیل آرزو کی جلائیں گی تتلیاں
لب پر حروفِ نعت سجائیں گی تتلیاں

میرے لئے بھی گنبدِ خضرا کے آس پاس
چھوٹا سا گھر ضرور بنائیں گی تتلیاں

اُن ﷺ کے نقوشِ پاک کو بوسہ دیئے بغیر
رستہ کبھی بھی ڈھونڈ نہ پائیں گی تتلیاں

دامانِ آرزوئے مدینہ میں آج بھی
فرقت کے آنسوؤں کو چھپائیں گی تتلیاں

پلکوں سے چوم چوم کے چوکھٹ حضور ﷺ کی
آنکھیں درِ نبی ﷺ پہ بچھائیں گی تتلیاں

بہرِ طوافِ نقشِ کفِ پائے مصطفیٰ ﷺ
آئیں گی تتلیاں، کبھی جائیں گی تتلیاں
اوراقِ جاں پہ رنگ بکھیرے گی شامِ وصل
دیوارِ شہرِ ہجر گرائیں گی تتلیاں

طائف کے سنگ ہاتھ میں لے کر سرِ بدن
فصلِ یقین و عزم اگائیں گی تتلیاں

دستِ دعا پہ رکھیں گی آنچل بہار کا
نقشِ خزاں تمام مٹائیں گی تتلیاں

مداحِ چشمِ ساقیٔ کوثر ہوں اس لئے
محشر میں مجھ کو پانی پلائیں گی تتلیاں

سورج چمن میں آگ لگاتا پھرے مگر
نعتِ نبی ﷺ کے پھول کھلائیں گی تتلیاں

خاکِ درِ نبی ﷺ مرے دامن میں ڈال کر
سوئے ہوئے نصیب جگائیں گی تتلیاں

بھر بھر کے جام چشمۂ رحمت سے آج بھی
تشنہ لبوں کی پیاس بجھائیں گی تتلیاں
مرنے کے بعد میری لحد کے جوار میں
بارِ قلم ادب سے اٹھائیں گی تتلیاں

کل بھی صبا کے لب پہ تری نعت تھی ریاضؔ
طیبہ سے آکے مجھ کو بتائیں گی تتلیاں