ہر ہر قدم پہ چاند ستارے بچھائے گی- ورد مسلسل (2018)

ہر ہر قدم پہ چاند ستارے بچھائے گی
اندر کی روشنی ہمیں رستہ دکھائے گی

دستِ دعا پہ آج بھی رعنائیِ خیال
عکسِ جمالِ گنبدِ خضرا بنائے گی

امشب بھی چرخِ مدحتِ خیرالانام ﷺ سے
نعتِ نبی ﷺ درود کی رم جھم میں آئے گی

خوش بخت ہے ہوائے گلستانِ آرزو
دامن میں پھول بھر کے مدینے سے لائے گی

آمد جنابِ سرورِ کون و مکاں کی ہے
قوسِ قزح زمیں پہ بھی راہیں سجائے گی

سردارِ کائنات ﷺ کے نقشِ قدوم پر
یہ کہکشاں بھی لعل و جواہر لٹائے گی
توصیفِ مصطفی کے چراغوں کی روشنی
محشر میں بھی ہمارا مقدر جگائے گی

آنکھیں سجا کے روزنِ شہر حضور ﷺ میں
بادِ شمال جشنِ مسرت منائے گی

پلکوں پہ احترام کے آنسو رکھے ہوئے
بادِ صبا، چراغ ادب کے، جلائے گی

تم دیکھنا ہوائے گلستانِ بے مثال
رخصت کے وقت نعتِ پیمبر ﷺ سنائے گی