چشمِ تر کی التجاؤں کے کفیل- ریاض حمد و نعت

اے کہ
ارضِ التجا پر بے نوائوں کے رسولؐ
اے کہ
خاکِ پاک میں لاکھوں کروڑوں ماہتاب
اے کہ
عرفاتِ سخن میں روشنی ہی روشنی
اے کہ
اربابِ دعا کی ہر دعا کے سائباں
اے کہ
تابندہ سحر کے رنگ و بو کی آبرو
اے کہ
صحنِ گلستانِ آرزو کی دلکشی
اے کہ
تقویٰ اور توکل کی بہار جاوداں
اے کہ
افکارِ پریشاں میں ثباتِ زندگی
اے کہ
دستارِ فضیلت آپؐ کے نقشِ قدم
اے کہ
نسلِ آدمِ خاکی کی عظمت کی دلیل
اے کہ
ہر مخلوق کے افضل تریں، خیرالبشرؐ
اے کہ
دامانِ حرا میں بندگی کی انتہا
اے کہ
صبحِ ارضِ جاں کی خوشبوئے لطف و کرم
اے کہ
پہلی روشنی کی آخری روشن کتاب

اے کہ
سدرہ سے بھی آگے کی بلندی کے سفیر
اے کہ
تاج و تختِ شاہی آپؐ کے قدموں کی دھول
اے کہ
بارانِ کرم ہے چشمِ رحمت کی عطا
اے کہ
ادوارِ گزشتہ کے رسولوں کے امام
اے کہ
محشر تک قیادت آپؐ ہی کے نام ہے
اے کہ
میرے دیدہ و دل کے مکینِ محتشمؐ
اے کہ
دستِ آرزو میں روشنی کے آفتاب
اے کہ
حرفِ عدل کی زندہ روایت کے امیں

اے کہ
میری سب دعائوں کا وسیلہ آپؐ ہیں
اے کہ
اقلیمِ محبت کے ازل سے حکمراں
اے کہ
محشر میں شفاعت کے علَم بردار آپؐ
اے کہ
مجھ کو آپؐ کے دامانِ رحمت کی طلب
اے کہ
میری چشمِ تر کی التجائوں کے کفیل
اے کہ
سرکارِ مدینہ آپؐ پر لاکھوں درود
اے کہ
محبوبِ خدا ہیں آپ پر لاکھوں سلام