’’خونِ رگِ جاں‘‘کا منظوم دیباچہ - آغا صادق- ریاض حسین چودھریؒ کا جہان فن

ادیبِ نکتہ سرا، نکتہ داں ریاضؔ حسین
ندیمِ بزمِ صفا، نکتہ داں ریاضؔ حسین

بڑے گداز بڑے جوش سے تہہِ دل سے
ہوا ہے گرم نوا نکتہ داں ریاضؔ حسین

حضورِ سرورِ ﷺ عالم جو استغاثہ کیا
تو مستغیث بنا نکتہ داں ریاضؔ حسین

جنابِ ختم رسل ﷺ کے سوا ہے کون جسے
سنا ئے حرفِ وفا نکتہ داں ریاضؔ حسین

وہی کریم، وہی پیشوا، وہی ھادی
ہے جس سے شکوہ سرا نکتہ داں ریاضؔ حسین

فضا جو شاعرِ مشرق نے کی یہاں پیدا
اُسی میں جذب ہوا نکتہ داں ریاضؔ حسین

کہا تو جذبِ اخوّت میں ڈوب کر ہی کہا
خلوص کی ہے صدا نکتہ داں ریاضؔ حسین

مراد و مقصدِ شاعر ہے دردِ دل کو نمود
ہے دردِ دل کی ندا نکتہ داں ریاضؔ حسین

سخن کے ساز سے نکلے جو نغمہ ہائے نیاز
تو نغمہ سنج ہوا نکتہ داں ریاضؔ حسین

نکل کے دل سے جو دل ہی میں ہوگئی پیوست
وہی ہے آہِ رسا نکتہ داں ریاضؔ حسین

یہ شوقِ خدمتِ دیں اور عنفوانِ شباب
کنارِ دیں میں پلا نکتہ داں ریاضؔ حسین

فغانِ وادی کشمیر اس کے دل کی صدا
شریکِ درد رہا نکتہ داں ریاضؔ حسین

جلی جو مسجدِ اقصیٰ تو وہ تڑپ اٹھا
اس آگ میں بھی جلا نکتہ داں ریاضؔ حسین

ہوا جو مشرقی بنگال مبتلائے جفا
تو وقفِ کرب رہا نکتہ داں ریاضؔ حسین

شکارِ ظلم تھا قبرص تو بیقرار تھا وہ
ہے آب و رنگِ وفا نکتہ داں ریاضؔ حسین

کہیں جو اہلِ وطن پر ذرا بھی آنچ آئی
تو چیخ چیخ اٹھا نکتہ داں ریاضؔ حسین

وطن کا دوست ہے ملت کا غمگسار ہے وہ
نقیبِ صدق و صفا نکتہ داں ریاضؔ حسین

چراغِ بزمِ محبت ہے سوزِ دل اس کا
ہے ظلمتوں میں ضیا نکتہ داں ریاضؔ حسین

سلف کے دل میں جو قربانیوں کا جذبہ تھا
ہے اس کی ایک ادا نکتہ داں ریاضؔ حسین

نثارِ قوم ہے اُس کے قلم کی ہر جنبش
صریرِ خامہ ہے کیا؟ نکتہ داں ریاضؔ حسین

میں اُس کو شاعرِ شیریں نوا سمجھتا تھا
مگر ہے اس سے سوا نکتہ داں ریاضؔ حسین