لایا ہے کون نقدِ دل و جاں سرِ ورق- رزق ثنا (1999)

لایا ہے کون نقدِ دل و جاں سرِ ورق
آنسو ہوئے کس کے فروزاں سرِ ورق

ہر ساعتِ عزیز عبادت میں ہو بسر
کیجئے ثنائے حاصلِ قرآں سرِ ورق

کھُلتے رہے ہیں پرچمِ توصیفِ مصطفی
ٹھہری رہی ہے گردشِ دوراں سرِ ورق

ذکرِ جوارِ گنبدِ خضرا ہوا ابھی
سمٹا ہوا ہے حسنِ گلستاں سرِ ورق

گجرے بنا رہی ہے درودوں کے چاندنی
سجدے میں گر پڑا ہے قلمداں سرِ ورق

کاغذ کا ایک پرزہ ہوائوں کی زد میں ہے
اک حرفِ التجا ہے مسلماں سرِ ورق

آقا حضورؐ چشمِ عنایت ہو آج بھی
ہر حرفِ آرزو ہے پریشاں سرِ ورق

حوّا کی بیٹیوں کو ردائے کرم ملے
کب سے ہے چاک اپنا گریباں سرِ ورق

آیا ہے کون گلشنِ ہستی میں دیکھنا
برپا ہوا ہے جشنِ چراغاں سرِ ورق

آیاتِ عشقِ سیدِ والا کا ہے نزول
دیدارِ مصطفی کا ہے امکاں سرِ ورق

آقا حضورؐ فاطمہ زہراؓ کا واسطہ
امت برہنہ سر ہے پشیماں سرِ ورق

لکھّوں بصد نیاز انہیں آج بھی ریاضؔ
دیباچۂ حیات کا عنوان سرِ ورق