یا محمدؐ! شبِ احوالِ پریشاں پہ نظر- متاع قلم (2001)

یا محمدؐ شبِ احوالِ پریشاں پہ نظر
میرے ہر الجھے ہوئے تارِ گریباں پہ نظر

جبیب و داماں میں کوئی رنگ نہ جگنو نہ گلاب
شہرِ زرتاب کے اک بے سروساماں پہ نظر

منتظر آپؐ کی چشمانِ کرم کے سب ہیں
صاحبِ جود و عطا! شامِ غریباں پہ نظر

ہر کلی دستِ دعا کب سے اٹھائے ہے حضورؐ
گرد میں لپٹے ہوئے حسنِ گلستاں پہ نظر

عرق آلودہ جبیں لائقِ سجدہ بھی نہیں
سر جھکائے ہوئے اس عہدِ پشیماں پہ نظر

خطہء پاک غلاموں کا ہے مسکن آقاؐ
خطہء پاک کے ہر منظرِ ویراں پہ نظر

مشعلِ علم بجھا دی سرِ مکتب ہم نے
عصرِ بے نور میں اہدافِ مسلماں پہ نظر

آپؐ کے نام کی دیتی ہے دہائی خلقت
حشر کا دن ہے غلامانِ غلاماں پہ نظر

ظلمتِ شام کی آندھی میں نہ بجھ جائے کہیں
کشتِ مژگاں میں اُگے سروِ چراغاں پہ نظر

آپ کا ادنیٰ سا شاعر ہے گرفتارِ بلا
یانبیؐ اس کے غمِ ارضِ دل و جاں پہ نظر

کس تجلی کے سمندر میں ہے دل کی کشتی
یارسولِ عربیؐ! دیدۂ حیراں پہ نظر

بھیگی پلکوں پہ ازل سے ہیں ہوس کے شعلے
فقرِ سائل پہ نگہ، منصبِ سلطاں پہ نظر