انتساب- متاع قلم (2001)

اے شاعرِ رسولِؐ ازل غور سے یہ سُن!
برسے گا تیرے ذہن کی گلیوں میں آج ہُن
اے دستِ شوق اسمِ محمد ورق پہ لکھ
اے ذوقِ نعت، عشق نبیؐ کے گلاب چن

میزان میں تلے گا ترا ایک اک عمل
اپنی شبِ سیاہ کے عنوان کو بدل
نعتِ نبیؐ کے سرمدی پھولوں کو چوم کر
اے نطقِ جاں گداز مچل دیر تک مچل

اے کلکِ خوش نصیب ذرا رقص میں تو آ
سدرہ کی انتہاؤں سے موتی اٹھا کے لا
اے کرمکِ خیال مدینے کی سمت اڑ
اے خوشبوئے ریاضِؔ نبیؐ روح میں سما

ہر لمحہ وقفِ مدحتِ خیر الوریٰ کروں
توفیق دے تو مر کے بھی اُنؐ کی ثنا کروں
اے بلبلِ ریاضِ مدینہ یہ فرض ہے
نعتوں کا انتساب بنامِ خدا کروں