منظر نامہ- خلد سخن (2009)

(نعتیہ سانیٹ)

آقاؐ ہے سر پہ شامِ حوادث کی کربلا
دیوار و در پہ بھوک کے جنگل اُگے ہوئے
دریا لبوں پہ تشنہ لبی کے جھُکے ہوے
کب سے ہمِیں ہیں جبرِ مسلسل میں مبتلا

چاروں طرف محیط ہے آفات کا دُھواں
پلکوں پہ رنج و غم کے ہیں آنسو رُکے ہوئے
آنکھوں میں روشنی کے سمندر بُجھے ہوئے
ننگے سروں پہ دُھوپ کی چبھتی ہیں کرچیاں

دامن میں چوبِ خشک ہو جیسے جلی ہوئی
نقش و نگارِ عزم و عمل سب مٹے ہوئے
میداں میں چار سمت ہیں خیمے جلے ہوئے
احوالِ روز و شب پہ نگہ ہو مرے نبیؐ!

ہر موڑ پر حیات کے ابرِ کرم ملے
آقا حضورؐ آپ کا نقشِ قدم ملے