درود پڑھنا، سلام کہنا- خلد سخن (2009)

صَلَّی اﷲُ عَلَیْکَ یَا رَسُوْل اﷲ وسلم عَلَیْکَ یَا حَبِیْبَ اﷲ

لبوں پہ اسمِ حضورؐ آئے
قلم یہ میرا بھی سر جھُکائے
فضا میں خوشبو بکھرتی جائے
ہوا چراغِ وفا جلائے

تو میرے آقاؐ پہ سر جھُکا کر
درود پڑھنا، سلام کہنا

صَلَّی اﷲُ عَلَیْکَ یَا رَسُوْل اﷲ وسلم عَلَیْکَ یَا حَبِیْبَ اﷲ

کرن خلاؤں میں جھلملائے
کلی کا گھونگھٹ ہوا اُٹھائے
دھنک اُفق پر دیے سجائے
شفق بھی نعتِ نبیؐ سنائے

تو میرے آقاؐ، پہ سر جھکا کر
درود پڑھنا، سلام کہنا

صَلَّی اﷲُ عَلَیْکَ یَا رَسُوْل اﷲ وسلم عَلَیْکَ یَا حَبِیْبَ اﷲ

صبا جو حکمِ حضورؐ لائے
ہوائے شہرِ نبیؐ بلائے
ستارا قسمت کا جگمگائے
قلم بھی دستِ دعا اُٹھائے

تو میرے آقاؐ، پہ سر جھکا کر
درود پڑھنا، سلام کہنا
صَلَّی اﷲُ عَلَیْکَ یَا رَسُوْل اﷲ وسلم عَلَیْکَ یَا حَبِیْبَ اﷲ