زہے نصیب اگر نکہتِ اذاں میں ہوں- آبروئے ما (2014)

زہے نصیب اگر نکہتِ اذاں میں ہوں
حدودِ خطۂ رحمت کی کہکشاں میں ہوں

زہے نصیب کہ طیبہ کے کارواں میں ہوں
کتابِ عشقِ مدینہ کی داستاں میں ہوں

زہے نصیب مَیں بانٹوں خلوص کی شبنم
انہیؐ کے لطف و کرم کے مَیں سائباں میں ہوں

زہے نصیب چراغاں ہو میرے آنگن میں
زمینِ خلدِ تمنا کے آسماں میں ہوں

زہے نصیب حضوری کا موسمِ دلکش
قدم قدم پہ محبت کے آستاں میں ہوں

زہے نصیب قلم رقص میں رہے میرا
تمام عمر اِسی بزمِ میکشاں میں ہوں

زہے نصیب تخیل مرے کی پروازیں
خیال و خواب کی بستی کے درمیاں میں ہوں

زہے نصیب مَیں دھوون حضورؐ کا مانگوں
ثنا کی شاخِ محبت کے آشیاں میں ہوں

زہے نصیب حجاباتِ گنبدِ خضرا
خدا کا شکر، اسی شہرِ زر فشاں میں ہوں

زہے نصیب ملا منصبِ ثنا گوئی
بڑے ادب سے نگارِ سخنوراں میں ہوں

زہے نصیب نقوشِ قدم کی رعنائی
درِ رسولِ محبت کے ہر جہاں میں ہوں

زہے نصیب درود و سلام کی رم جھم
مَیں آبِ زر کے اِسی بحرِ بیکراں میں ہوں

زہے نصیب مدینے کی پھول سی گلیاں
ازل سے دامنِ سرکارِ مہرباںؐ میں ہوں

زہے نصیب مدینے کے پر سکوں لمحے
مرے خدا ترے محبوبؐ کی اماں میں ہوں

زہے نصیب ہوائیں درود پڑھتی ہیں
ریاضؔ، وادیٔ بطحا کے ارمغاں میں ہوں