قلم سجدے میں گر کر آج بھی حرفِ دعا لکھے- خلد سخن (2009)

قلم سجدے میں گر کر آج بھی حرفِ دعا لکھّے
ابد تک یاخدا! تیرے محمدؐ کی ثنا لکھّے

ادب کا یہ تقاضا ہے بوقتِ حاضری، زائر
نگاہِ بے طلب سے لوحِ دل پر مدعا لکھّے

مَیں ہر ساعت کے ہونٹوں پر گلابِ نعت رکھتا ہوں
بہارِ جاوداں، میرے مقدّر میں صبا لکھّے

ثنائے مصطفیٰؐ کے بعد اوراقِ تمنّا پر
قلم اِس سوچ میں گم ہے کہ لکھّے بھی تو کیا لکھّے

کہیں خاتم، کہیں افضل، کہیں عادل، کہیں صادق
کتابِ آسمانی میں انہیں میرا خدا لکھّے

مری پہچان مر کر بھی انہیؐ کے دم قدم سے ہو
ہوا میری لحد پر بھی غلامِ مصطفیٰؐ لکھّے

دھنک کے رنگ اُتریں دامنِ کلکِ تمنا میں
مرے دستِ ہنر پر چاندنی حرفِ وفا لکھّے

خدائے روز و شب سے التجا ہے اُنؐ کے صدقے میں
مری مردہ زمینوں کے لیے آبِ بقا لکھّے

سیہ اعمال نامے پر تشکّر کے گریں آنسو
فرشتہ جب سرِ محشر شفاعت کی ردا لکھّے

فراتِ عشق کے تشنہ کنارے پر لگا خیمے
خدا تیری بھی قسمت میں شعورِ کربلا لکھّے

اُٹھا کر مال و زر تم، کاتبِ تقدیر سے کہنا
مرے بچوں کے حصے میں نبیؐ کے نقشِ پا لکھّے

مری ہر داستانِ غم بیاں ہو جس کے ہونٹوں سے
ریاضؔ، اِک نعت چشمِ تر سخنور سے جدا لکھّے