ثنائے خواجہؐ: سب قلم اور سب حروفِ معتبر محوِ درود- کائنات محو درود ہے (2017)

سب قلم اور سب حروفِ معتبر محوِ درود
دل کی سب ہیں دھڑکنیں شام و سحر محوِ درود

کیا مکمل ہے خدائے مصطفی کا ضابطہ
حوریں سب محوِ ثنا، جنّ و بشر محوِ درود

اس یقیں کے ساتھ کرتا ہوں مَیں اشکوں سے کلام
بعدِ محشر بھی رہے گی چشمِ تر محوِ درود

کیا مدینے کی تڑپ اور کیا مدینے کا سفر
اِس سفر میں ہیں چراغِ رہگذر محوِ درود

ہر افق پر چاندنی لکھتی رہی صلِّ علیٰ
کہکشاں، سیّارگاں، شمس و قمر محوِ درود

چشمِ رحمت کو طلب کرتی رہی اُنؐ کی ثنا
میرے ویرانے میں شاخِ بے ثمر محوِ درود

ہر بھنور، ہر موجِ سرکش کو بھی ہے پاسِ ادب
ہر سمندر، ہر جزیرہ، ہر نگر محوِ درود

کب سے ہے جاری نزولِ رحمتِ پروردگار
گردشِ افلاک ہے محوِ سفر، محوِ درود

جاگتی رہتی ہیں دیواریں پسِ حرفِ دعا
آپؐ کے ادنیٰ سے شاعر کا ہے گھر محوِ درود

پھول کی پتی ازل ہی سے ہے مصروفِ ثنا
پھول کی پتی پہ شبنم کے گہر محوِ درود

خوشبوؤں کے لب پہ ہے صلِّ علیٰ کی نغمگی
آشیانوں میں پرندے نغمہ گر محوِ درود

حق غلامی کا ادا ہو، یہ نہیں ممکن مگر
شاعری میری رہے گی عمر بھر محوِ درود

حجلۂ افکارِ نو کے دامنِ صد رنگ میں
عالمِ وارفتگی میں ہے نظر محوِ درود

برف زاروں میں ہوائیں اُنؐ کو کرتی ہیں سلام
دھوپ کے صحرا میں ہیں بوڑھے شجر محوِ درود

رقص کرتی ساعتوں کے لب پہ ہے نعتِ رسولؐ
میرے جامِ آرزو میں آبِ زر محوِ درود

پھول، کلیاں، چاند، تارے، بادِ شبِ، بادِ نسیم
خوبیٔ قسمت کہ سب ہیں ہمسفر محو درود

ہجر کی چادر میں رہتے ہیں ہمیشہ اشکبار
میرے گھر کے منتظر دیوار و در محوِ درود

کتنی دلکش آرزو ہے ایک شاعر کی حضورؐ
عمر بھر خوش خوش رہوں مَیں بے ہنر محوِ درود

آسماں سے لوٹنے والی صداؤ! مرحبا
ہے غلامی کی دعائے پُر اثر محوِ درود

آپؐ کی توصیف کے سانسوں میں جلتے ہیں چراغ
جان و دل، لوح و قلم اور بال و پر محوِ درود

بارشیں پہلے درِ اقدس پہ کرتی ہیں سلام
اور ہو جاتے ہیں پھر برق و شرر محوِ درود

خوف کی چادر کا دامن کیوں نہ ہو گا تار تار
میرے اندر کے توہّم اور ڈر محوِ درود

کام کوئی کام کا کر جاؤں ربِ ذوالجلال!
تا ابد میری ہو عمرِ مختصر محوِ درود

زخم بھر لایا ہوں دامانِ غلامی میں حضورؐ
آپؐ کی امت کا ہے اک نوحہ گر محوِ درود

میر و سلطاں کو گدائی پر بڑا ہی ناز ہے
آپؐ کے در پر پڑے ہیں تاجور محوِ درود

کیا فضیلت ہو بیاں سرکارؐ کی مجھ سے ریاضؔ
آسماں پر ہے خدائے بحر و بر محوِ درود