انہیں سلطانِ ما لکھنا، انہیںؐ خیرالوریٰ لکھنا- کائنات محو درود ہے (2017)

انہیں سلطانِ ما لکھنا، انہیں خیرالوریٰؐ لکھنا
مرے آقائے رحمت کو امام الانبیاؐ لکھنا

غبارِ شہرِ طیبہ سے ذرا سے روشنی لے کر
کتابِ زندگی کے ہر ورق کا حاشیہ لکھنا

مری عمرِ پریشاں کا بھرم رہ جائے گا سانسو!
دمِ رخصت مرے ہونٹوں پہ اسمِ مصطفیؐ لکھنا

سجانا آئنے ہی آئنے راہِ محبت میں
کتابِ دیدہ و دل میں حروفِ دلربا لکھنا

مقدر کا ستارا جب چمک اٹھّے نگاہوں میں
درِ سرکارؐ پر اشکوں سے حرفِ التجا لکھنا

عطاؤں کے سمندر کا کنارا ہی نہیں کوئی
کرم کی ابتدا لکھنا، کرم کی انتہا لکھنا

درودِ پاک پڑھتی ہے، سلامِ شوق کہتی ہے
مرے آنگن کی چڑیا کو ہُما سے بھی سوا لکھنا

زباں میری ہو جب مصروف اُنؐ کا ذکر کرنے میں
قلم! تختی پہ تُو صلِّ علیٰ صلِّ علیٰ لکھنا

یہی تو روشنی کے استعارے ہیں خلاؤں میں
کروڑوں کہکشاؤں کو نبیؐ کے نقشِ پا لکھنا

حسینیت نہیں محدود ماہ و سال کے اندر
حسینیت کو پوری زندگی کا ضابطہ لکھنا

مسلسل میرے آنگن میں بہاریں رقص کرتی ہیں
مسلسل ہے مدینے سے قلم کا رابطہ لکھنا

کتابِ عصرِ نو کے ہر ورق پر چشمِ پرنم سے
ریاضؔ، امت کے زخموں کو عروسِ کربلا لکھنا