میری سوچوں کے نگر میں روشنی ہے روشنی- کائنات محو درود ہے (2017)

میری سوچوں کے نگر میں روشنی ہے روشنی
دامنِ شام و سحر میں روشنی ہے روشنی

ہر زمانے کے برہنہ سر پہ سایہ آپؐ کا
ہر صدی کے بال و پر میں روشنی ہے روشنی

گنبدِ خضرا کا ہر عکسِ منّور اس میں ہے
آئنۂ چشمِ تر میں روشنی ہے روشنی

یہ مدینے کے در و دیوار کا فیضان ہے
میرے دستِ بے ہنر میں روشنی ہے روشنی

جانبِ طیبہ چلیں پڑھتے ہوئے اُنؐ پر درود
بے خبر! گردِ سفر میں روشنی ہے روشنی

بڑھ کے چومیں گی مدینے کے مسافر کے قدم
اس لئے ہر رہگذر میں روشنی ہے روشنی

میرے ہر آنسو میں ہے خاکِ درِ خیرالبشرؐ
دیدۂ پرنم کے گھر میں روشنی ہے روشنی

نعتِ سرکارِ دو عالمؐ کے چراغوں کے طفیل
میری عمرِ مختصر میں روشنی ہے روشنی

ان حسیں گلیوں سے گذرے تھے مرے آقا حضورؐ
لمحہ لمحہ بام و در میں روشنی ہے روشنی

مکتبِ عشقِ پیمبرؐ کی فضاؤں کو سلام
علم کے برگ و ثمر میں روشنی ہے روشنی

کس نے بھیجا ہے مجھے اخبارِ تہذیبِ حرم
ہر ورق پر ہر خبر میں روشنی ہے روشنی

سب حروفِ لب کشا کے لب معطر ہیں ریاضؔ
سب حروفِ معتبر میں روشنی ہے روشنی

خوش نصیبی کے ہیں جگنو ہمسفر میرے ریاضؔ
راستے کے ہر شجر میں روشنی ہے روشنی

آپؐ کے نقشِ کفِ پا کی بدولت ہی ریاضؔ
آسمان و بحر و بر میں روشنی ہے روشنی