دل میں مچل رہی ہے یہ آرزو پرانی- خلد سخن (2009)

دل میں مچل رہی ہے یہ آرزو پرانی
خاکِ رہِ مدینہ لکھّے مری کہانی

محشر تلک خدا کی سنت پہ مَیں چلوں گا
میرا خدا ہے رسمِ عشقِ نبیؐ کا بانی

آسان تو نہیں ہے راہِ وفا پہ چلنا
اُڑنے لگا ہوا میں چشمِ طلب کا پانی

آب و ہوائے شہرِ سرکارؐ سے ہے نسبت
ہر روز حرفِ نو کی ہوتی ہے گلفشانی

رودادِ شامِ ہجراں ساری بیان کر دے
کشکولِ چشمِ تر میں ایسی تو ہو نشانی

لکنت زدہ زباں ہے، حسنِ بیاں کہاں ہے
نعتِ نبیؐ سنو گے؟ وہ بھی مری زبانی

آنکھوں کو بند کر کے مَیں نعت پڑھ رہا ہوں
ہر شاخ پر پرندے دیکھے ہیں آسمانی

نغماتِ مصطفیٰؐ سے معمور ہیں فضائیں
کیفِ ثنا میں ڈوبی کیا رات ہے سہانی

اظہارِ حالِ دل سے ملتی نہیں ہے فرصت
ممکن نہیں کسی کی طیبہ میں ترجمانی

بچوں کے سر پہ آقاؐ، ہو سائباں کرم کا
زندہ ہے ہر مکاں میں احساسِ لامکانی

توصیفِ مصطفیٰؐ کی اقلیمِ صد ادب میں
ہرگز نہ کیجئے گا کوئی غلط بیانی

چلیے ریاضؔ لوحِ دل پر درود لکھ دیں
تشنہ لبوں پہ مانگے حرفِ دعا روانی