دیدہ و دل میں وہی کلکِ ثنا کی روشنی- دبستان نو (2016)

شکر واجب ہے ترا ربِّ جہاں، پچھلے برس
رقَص میں نطق و بیاں میرے رہے شام و سحر
خوشبوئیں محوِ طوافِ گنبدِ خضرا رہیں
پھول لکھتا ہی رہا میرا قلم اوراق پر
وادیٔ مدحت میں چلتی ہی رہی بادِ صبا
میری آنکھیں مسجدِ نبوی میں سجدے میں رہیں
میرے ہونٹوں پر رہی نعتِ نبیؐ کی کہکشاں
میری پلکوں پر ستارے سے چمکتے ہی رہے
میری سانسوں میں رہے مدحت نگاری کے صدف
دست بستہ دل کی ہر دھڑکن مواجھے میں رہی
ہر ورَق پر نعت کے لاکھوں رہے روشن چراغ
رتجگوں کا سلسلہ پڑھتا رہا اُنؐ پر درود
دامنِ بادِ خنک میں پھول ہی گرتے رہے
ہر کلی گجرے سلاموں کے بناتی ہی رہی
دیدہ و دل میں رہی کلکِ ثنا کی روشنی
حوصلہ دیتی رہی شہرِ پیمبرؐ کی ہوا
اُنؐ کی چوکھٹ سے لپٹتی ہی رہیں محرومیاں
جگنوؤں کے لب پہ تھی صلِّ علیٰ کی چاندنی
تتلیوں کے رنگ طیبہ میں بکھرتے ہی رہے
خاکِ طیبہ روز ہی لاتی رہی، بادِ نسیم
چوم کر آتی رہی کلکِ ادب نقشِ قدم
خلدِ طیبہ کی ہوا سے گفتگو ہوتی رہی
میرے لفظوں میں مضامیں نعت کے روشن رہے
اس برس بھی چشمِ تر میں گنبدِ خضرا رہا
اُنؐ کی آمد کے رہے دیوار و در بھی منتظِر!

اِس برس بھی طائرِ حرفِ ثنا اڑتا رہا
اُنؐ کے در پر دست بستہ مَیں بھی تھا محوِ ثنا