گذر رہی ہے مدینے کے لالہ زاروں میں- روشنی یا نبی ﷺ (2018)

چمن چمن میں اترتی ہوئی بہاروں میں
افق افق پہ بکھرتے ہوئے ستاروں میں
قدم قدم گھنے اشجارِ سایہ داروں میں
دھنک، چراغ، شفق، روشنی کے دھاروں میں
نقوشِ پائے محمد ﷺ کے ماہ پاروں میں
مرے حضور ﷺ کی رحمت کی آبشاروں میں
شعورِ نعتِ پیمبر ﷺ کے شاہکاروں میں
ثنائے مرسلِ آخر ﷺ کے تاجداروں میں
حدیثِ عشق پیمبر ﷺ کے استعاروں میں
چراغ بانٹتے خوشبو کے ریگ زاروں میں
دعائے سیدِ عالم ﷺ کے سبزہ زاروں میں
سفر نصیب محبت کی رہگذاروں میں
چہار سمت بچھے سبز مرغزاروں میں
کرم کے عافیت کے اَن گنت حصاروں میں
ہوا کے دوش پہ اڑتے ہوئے سواروں میں
بساطِ امن میں لپٹے ہوئے اشاروں میں
فراق و ہجرِ پیمبر ﷺ کے دلنگاروں میں
نبی ﷺ کی اُمّتِ عاصی کے غمگساروں میں
متاعِ حُبِّ محمد ﷺ کے پاسداروں میں
فراتِ عشق کے تشنہ دہاں کناروں میں
ادب سے وجد میں آتے ہوئے شراروں میں
دلِ گداز میں بہتی سی جوئباروں میں
درِ نبی ﷺ پہ کھڑے کب سے اشکباروں میں
ہزار منحرف چہروں میں، شرمساروں میں
حضورِ حسن جھکے سر، گناہ گاروں میں
عظیم مسجدِ نبوی ﷺ کے شب گذاروں میں
درود پڑھتے ہوئے سرمدی چناروں میں
کبھی کبھار سہی، بے خودی کے غاروں میں
غلام زادے بھی شامل ہیں خاکساروں میں
حضور ﷺ، آپ ﷺ کے نسلاً وفا شعاروں میں

خدا کا شکر ہے عمر رواں ہماری بھی
گذر رہی ہے مدینے کے لالہ زاروں میں