حضورؐ اُمّتِ بے نور کو یدِبیضا- ریاض حمد و نعت

حضورؐ
ارض و سما میں سحر نہیں ہوتی
حضورؐ
کلکِ مؤدت اداس رہتی ہے
حضورؐ
شہرِ عمل میں نہیں دیے روشن
حضورؐ
اشک کروڑوں اگے ہیں کھیتوں میں
حضورؐ
پھول کسی شاخ پر نہیں ملتے
حضورؐ
خوف کی چادر تنی ہے بستی پر

حضورؐ
روشنی زنجیر پا ہوئی کب سے
حضورؐ
آئنے ٹوٹے ہوئے ہیں راہوں میں
حضورؐ
آبِ خنک اب نہیں کٹوروں میں
حضورؐ
امن کی ہر فاختہ ہے مقتل میں
حضورؐ
مانگ ہے اجڑی ہوئی سویروں کی
حضورؐ
خون کے چھینٹے پڑے قباؤں پر
حضورؐ
موت کے ہیں قہقہے مناظر میں
حضورؐ
مامتا زخمی ہے کتنی ماؤں کی
حضورؐ
اُمّتِ سرکش کی سر کشی کو لگام
حضورؐ
اُمّتِ بے نور کو یدِ بیضا
حضورؐ
آج بھی بے نور ہر جھروکہ ہے
حضورؐ
قریۂ اُمّت میں علم کا موسم
حضورؐ
دامنِ اُمّت میں پھول کرنوں کے
حضورؐ
دامنِ اُمّت میں ہر خوشی کا نزول
حضورؐ
دامنِ اُمّت میں امن کی ٹھنڈک
حضورؐ
دامنِ اُمّت میں حوصلوں کا نزول
حضورؐ
دامنِ اُمّت میں خوشبوؤں کا ہجوم

حضورؐ
دامنِ اُمّت میں آبِ رحمت بھی
حضورؐ
دامنِ اُمّت میں خوشبوؤں کے گلاب
حضورؐ
دامنِ اُمّت میں بندگی کا شعور
حضورؐ
دامنِ اُمّت میں مدحتوں کے گلاب
حضورؐ
آپؐ کی اُمّت سلام کرتی ہے
حضورؐ
آپؐ کی اُمّت ہے طالبِ رحمت
حضورؐ
آپؐ کی اُمّت ہے شرمسار بہت
حضورؐ
آپؐ کی اُمّت کی چشمِ تر ہو قبول