صلِّ علیٰ نبینا، صلِّ علیٰ محّمدٍ- متاع قلم (2001)

مہر میں روشنی نہ تھی، تیرہ و تار تھی فضا
مژدۂ جانفزا لیے آئی فلک سے یہ ندا

صلِّ علیٰ نبینا، صلِّ علیٰ محمدِِ

نور کی آخری کتاب لے کے حضورؐ آ گئے
قلب و نظر سے دھند کے پردے سبھی ہٹا گئے

صلِّ علیٰ نبینا، صلِّ علیٰ محمدِِ

نعتِ نبی کا ہے کرم زرد زمینِ ذہن پر
لوح و قلم مرے بھی ہیں موسمِ گل کے ہمسفر

صلِّ علیٰ نبینا، صلِّ علیٰ محمدِِ

آپ کے ذکر پاک سے کھُلتے ہیں چاندنی کے لب
آپ کے نقشِ پا سے ہے حُسن و جمالِ روز و شب

صلِّ علیٰ نبینا، صلِّ علیٰ محمدِِ

خیرِ بشر بھی آپ ہیں خیر وریٰ بھی آپ ہیں
احمدِ مصطفیٰؐ بھی آپؐ نورِ ھدیٰ بھی آپ ہیں

صلِّ علیٰ نبینا، صلِّ علیٰ محمدِِ

آپ کے ذکر پاک سے قریۂ جاں میں روشنی
شہرِ گماں میں روشنی کون و مکاں میں روشنی

صلِّ علیٰ نبینا، صلِّ علیٰ محمدِِ

روزِ ازل سے معدنِ عقل و شعور آپؐ ہیں
میرے نبیؐ مرے رسولؐ میرے حضورؐ آپ ہیں

صلِّ علیٰ نبینا، صلِّ علیٰ محمدِِ

آپ کے دم سے خوشنما نقش و نگار زندگی
غارِ حرا کی آج بھی چاروں طرف ہے روشنی

صلِّ علیٰ نبینا، صلِّ علیٰ محمدِِ

مونسِ بیکساں بھی آپؐ ہمدمِ ناتواں بھی آپؐ
ابرِ شفا بھی آپؐ ہیں رحمتِ بیکراں بھی آپؐ

صلِّ علیٰ نبینا، صلِّ علیٰ محمدِِ

نوعِ بشر کی آبرو، جن و ملک کی آرزو
آپؐ حضورؐ آپؐ ہی جلوہ نما ہیں چار سو

صلِّ علیٰ نبینا، صلِّ علیٰ محمدِِ

عرشِ بریں پہ بے نظیر فرشِ بریں پہ بے مثال
مقصدِ خلقِ کائنات رحمت ربِّ ذوالجلال

صلِّ علیٰ نبینا، صلِّ علیٰ محمدِِ

آ کے خبر بھی لیجئے اُمّتِ خستہ حال کی
کچھ تو سبیل ہو حضورؐ زخموں کے اندمال کی

صلِّ علیٰ نبینا، صلِّ علیٰ محمدِِ

مَیں بھی ہوں غرقِ چشمِ نم مَیں بھی ہوں مبتلائے غم
حاضرِ بارگاہ ہوں، چشمِ کرم شہِ امم

صلِّ علیٰ نبینا، صلِّ علیٰ محمدِِ

تشنہ زمینِ جسم پر ابرِ کرم کا ہو نزول
کرب و بلائے عصر میں بادِ خنک بھی یارسولؐ

صلِّ علیٰ نبینا، صلِّ علیٰ محمدِِ

وہم و گماں کا سلسلہ تھمتا نہیں مَیں کیا کروں
گرد و غبارِ شب میں ہے میر یقیں مَیں کیا کروں

صلِّ علیٰ نبینا، صلِّ علیٰ محمدِِ

سوز و گدازِ ہجر ہے آنکھوں میں پھر رواں دواں
حکمِ سفر کے منتظر حرفِ دعا کے کارواں

صلِّ علیٰ نبینا، صلِّ علیٰ محمدِِ

نطق و بیاں رہے نگوں آپ کے در پہ رات بھر
کیجئے قبول یانبیؐ اشکِ روانِ چشمِ تر

صلِّ علیٰ نبینا، صلِّ علیٰ محمدِِ

دورِ جدید بھی تو ہو حسنِ عمل سے آشنا
اُمّتِ بے چراغ کو کوئی کرن کریں عطا

صلِّ علیٰ نبینا، صلِّ علیٰ محمدِِ