تضمین بر کلامِ قدسی- متاع قلم (2001)

ہجر کے دیس کی ویران ہے ہر راہگذر
کس طرح ہوتی ہے دیوانے کی اب رات بسر
کس طرح جلتا ہے سوکھے ہوئے خوابوں کا شجر
ایک سناٹا سا ہے میری صداؤں کا کھنڈر
میرے گھر کے بھی دریچوں میں کھلے بادِ سحر
ـ’’چشمِ رحمت بکشائے سوئے من انداز نظر
اے قریشی لقب و ہاشمی و مطّلبی‘‘
ہر قدم پر ہے یہاں مرکزِ الطاف و کرم
ڈھانپ لیتے ہیں خطاکاروں کو انوارِ حرم
اطلسِ نور میں ہیں لپٹے ہوئے لوح و قلم
جرأتِ جنبشِ لب بھی نہیں کیا کیجئے رقم
چشمِ بے تاب تو ہے روزِ ازل سے پُرنم
’’منِ بیدل بجمالِ تو عجب حیرانم
اللہ اللہ چہ جمال است بدیں بوالعجبی‘‘

کیا دکھاؤں کسی قابل ہی نہیں ہے چہرہ
برگِ آوارہ سرِ شہرِ حوادث تنہا
روسیہ، جس کی جبیں پر ہے گناہوں کی گھٹا
اس کا کیا نام و نسب اس کی ہے اوقات ہی کیا
یہ سرِ چشم پکارے گا کسے تیرےؐ سوا
’’نسبتے نیست بذاتِ تو بنی آدم را
بہتر از آدم و عالم تو چہ عالی نسبی‘‘